Fredrik Prost lea garraduojár gii boahtá Viikusjávrris mii lea unna giláš Vazáš čearus davimus Ruoŧas. Son duddjo juohkelágan garradujiid. Bajásšaddamis son oinnii čáppa dujiid maid sohka ja iežá olbmot duddjoje ja miella ieš álgit duddjot šattai. Boarrásit duojáriin son oahpai vuođu ja 1995 álggii 15-jahkásažžan ruovttus duddjot. Moadde jagi maŋŋil son váccii golbma jagi Sámiid oahpahusguovddažis Johkamohkis ja beasai oahppat muhtin daid Sámi čeahpimus duojáriin.
Dál son bargá beaivválaččat dujiin ealáhussan. Su duojis son geavaha dušše luondduávdnasiid ja vuođđu lea min rikkes Sámi duodjeárbevierru. Árbevirolaš duojis lea juohke oassi dehálaš ja dan dihte son ieš ráhkada visot ávdnasiid dego niibederiid, sastti ja riehti. Luonddus son gávdná sihke ávdnasiid ja bargomovtta.
Prost lea maiddái čálli, ja 2023 son almmuhii iežas vuosttaš girjji, DAT lágadusas. Girji man namma lea Leŋges hearggi sáhčal fatnasa, čilge sámi luondduoskku ja vuoiŋŋalaš árbevieru. Girjjis čilgejuvvo maiddái got ráhkada ja geavaha meavrresgári, muitalusaiguin ja divttaiguin min vuoiŋŋalaš árbevierru čilgejuvvo. Leŋges hearggi sáhčal fatnasa lea čállojuvvon sámegillii ja ii goassege jorgaluvvo ovttage váldogillii, dainna lágiin vuoiŋŋalaš máhttu ja árbevierru seailluhuvvo sámi kultuvrra siste ja sámiid gaskkas.
Vuollegašvuođain Fredrik Prost doalvu viidáseappot sámi duodjeárbbi ja kultuvrra boahttevaš buolvvaide.
Deaddil liŋkka oaidnit listtu visot čájáhusain ja bálkkašumiin >>