Àbadakone ja National Gallery of Canada

Duorasdaga skábmamánu 7 beaivvi rahpasa National Gallery of Canada Àbadakone-čájáhus Ottawas Kanádas. Àbadakone mearkkaša agalaš dolla. Dat lea stuora riikkaidgaskasaš čájáhus gos badjel 70 eamiálbmot dáiddára 16 sierra riikkain servet. Dieđusge illudin go sii jerre mu nai searvat dan čájáhussii.

Dat duodji maid sii sihte mu duddjot Àbadakonii lei dat basimus diŋga mii mis lea, govadas. Govadas han lea juoga mainna mon lean bargan ja dutkan badjel 15 jagi nu ahte sii sihte dan ii lean gal nu hirpmástus. Mon lean 2001 juo, goas dahken mu vuosttaš govadasa, mearridan ahte mon vuovddán govadasaid dušše sápmelaččaide. Dat lea min bassi diŋga ja min bassi árbevierru maid mii ja dušše mii galgat oamastit ja hálddašit muhto dan čájáhussii gos lean ovttas mu eamiálbmot oappáiguin ja vieljaiguin mon liikká mearridin dahkat ovtta govadasa, dat dovdui njuolga.

Nu got mon oainnán govadasa dat ii leat dáiddabargu muhto atnudiŋga. Dat ii mearkkaš ahte govadas ii sáhte leahkit čáppa ja ahte ii mana čiŋadit ja fiidnát hervet dan. Dat lea oalle duohta go lea sáhka dan govadasa birra maid lean duddjon Àbadakonii, dat lea okta daid dujiin masa mon lean dan rádjái bidjan gait eanemus barggu ja áiggi nu ahte muhtin muddui dat fal lea dáiddabargu liikká. Dat lea váttis árvvoštallat man olu áiggi lean bidjan dan prošektii muhto dušše gávdnat báhki válddii moadde beaivvi. Dat ii mana váldit váikko makkár muora jos galgá dahkat govadasa. Dat galgá leahkit beahcebáhkki mii šaddá dan njuolga muoras, njuolga báikkis ja dasa lassin njuolga bealde muoras.

Dat lea juste dat mii boahtá millii go jurddašan eamiálbmot dáidaga, ahte dat lea ádjás bargu mii lea čáppa, vuohkkasit dahkon ja čadnon ealli árbevirrui. Mu vásáhus ođđaáigásaš dáidagis lea ahte dáiddár geahččala dahkat juoidá mii lea friddja, ii čadnon makkárge árbevirrui ja vuođđu ii leat giehtačehpodat. Dat dovdu munnje sihke láittas ja duođain ii nu beroštahtti obanassiige. Ii giige leat oktonas suolu, dat lea álo gullevašvuohta ollisvuhtii. Dan dihte mon nu vuorddán Àbadakonii gosa nu ollu čeahpes eamiálbmot dáiddárat leat čoahkkanan. Dáidda mii lea vuođđuduvvon ja čadnon ealli árbevirrui ja giehtačehpodahkii.