Earenoamáš niibi earenoamáš olbmui

Mon lean guhkká bargan duojárin ja olu prošeavttat leat boahtán ja mannan. Muhtin duojit leat
somábut dahkat go iežát. Muhtimin lea earenoamáš prošeakta masa bidjá sihke áiggi ja váimmu, dat
niibi mii das oidno lea diekkár bargu.
Mu guovllus lea dábálaš leamaš váimmuid hervet ja earenoamážit jos dat duodji lea meidnejuvvon earenoamáš olbmui, dego dat niibi.
Ja mu guovllus lea maiddái leamaš árbevierru nađđii bidjat olu asehis čoarvebinnáid ovdal go guhkes muorrabinná. Mon in leat goassege ovdal dahkan dakkár málle niibbi, muhto ii leat ge leamaš dárbu ovdal.
Lea dehálaš ealihit árbevieruid ja dan sámi iešvuođa. Mis lea min iežamet málle dahkat diŋggaid ja min iežamet jurddahanvuohki.
Árbevierru sáhttá muitalit olu ovtta álbmoga birra. Mii sámiid skeaŋkkat leat dávjá ánolaš diŋggat dego ovdamearkka dihte dat niibi. Vaikko lea ge earenoamáš niibi earenoamáš olbmui de lea liikká meidnejuvvon atnuniibin ja galgá fiinnis leahkit muhto ii nu fiinnis ahte ii ráske geavahit.
Árbevierut leat dehálaččat ja giella lea dat nai hui dehálaš dieđusge, giella han lea dat siskkimus mii hábme ja bidjá ivnniid jurdagiidda. Dan dihte mon čálán dan teavstta sámegillii ja dan dihte mon lean jorgalan olles mu ruovttosiiddu sámegillii. Skádjos gollegiella!